Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Чех Улс дахь төрийн айлчлал үргэлжилж байна.
Айлчлалын хоёр дахь өдөр буюу 03 дугаар сарын 11-ний өдөр Бүгд Найрамдах Чех Улсын Хөдөө аж ахуйн яаман дээр Монгол Улсын Хүнс, хөдөө аж ахуй, хөнгөн үйлдвэрийн сайд Ж.Энхбаярыг Бүгд Найрамдах Чех Улсын Хөдөө аж ахуйн сайд Марек Виборн албаны бусад төлөөлөгчдийн хамт хүлээн авч, уулзлаа.
Талууд байгуулсан Харилцан ойлголцлын санамж бичгийн хүрээнд хоёр талт хамтын ажиллагааны боломжийн талаар санал солилцож, монголын хөдөө аж ахуйн түүхий эдийн баазыг ашиглаж, чехийн дэвшилтэт технологи, ноу-хауг нэвтрүүлэн гуравдагч зах зээлд хамтран ажиллах талаар хэлэлцэв.
Мөн түүнчлэн мал эмнэлэг, малын удмын сан, хүнсний үйлдвэрлэл, хөнгөн үйлдвэрлэлийн салбарт боловсон хүчин бэлтгэх, төрөөс хувийн хэвшлийг бодлогоор дэмжих зэрэг сэдвийг хөндөж, цаашид хамтын ажиллагааг эрчимжүүлэн хөгжүүлэхээр харилцан тохиролцов.
