Ургамлын эрүүл мэнд, био аюулгүй байдал нь дэлхий дээрх амьдралын үндэс суурь юм. НҮБ-ын Ерөнхий Ассамблейгаас ургамлын эрүүл мэндийг хамгаалахын ач холбогдол, түүний нийгэм, эдийн засаг, байгаль орчинд үзүүлэх нөлөө, хүнсний баталгаат байдлыг хангах болон экосистемд гүйцэтгэх үүргийн талаарх ойлголт, мэдлэгийг олон нийтэд өгч, сайн туршлагыг түгээн таниулах зорилгоор 2020 оныг “Ургамлын эрүүл мэндийн олон улсын жил” болгон зарлаж, энэ хүрээнд холбогдох ажлуудыг хийхийг гишүүн орнууддаа уриалсан байдаг. Мөн Нэгдсэн үндэсний байгууллагын Хүнс хөдөө аж ахуйн байгууллагын судалгаагаар хүний өдөрт хэрэглэж буй хүнсний 80.0 хувийг ургамлын гаралтай хүнс эзэлж байгаа ба бидний амьсгалж буй хүчилтөрөгчийн 98 хувийг ургамлаас хангадаг нь тогтоогджээ. Эндээс харахад хүн өдөрт хүнснээс авах илчлэгийнхээ 40 хувийг ургамал болон түүний гаралтай бүтээгдэхүүнээс авдаг байна. Түүнчлэн дэлхийд үйлдвэрлэгдэж байгаа шувууны махны 72%, өндөгний 43%, гахайн махны 55% нь үр тариа, тосны ургамлаар тэжээсэн гахай шувууны эрчимжсэн фермээс гаралтай байгаа бол бэлчээрийн мал аж ахуй 100% байгалийн ургамлаас хамааралтай байна. Тиймээс “ургамлыг хамгаалснаар өөрсдийнхөө эрүүл мэнд, амь насаа хамгаалж байна” гэсэн үг.
Монгол улс 1996 онд анхны “Ургамал хамгааллын тухай” хуулиа баталж, 2007 онд шинэчлэн найруулсан бөгөөд 2024.05.30-ний өдөр “Ургамлын эрүүл мэнд, Ургамал хамгааллын тухай хууль” нэрээр УИХ-аар шинэчлэн баталсан. Мөн 1951 онд НҮБ-ийн Хүнс, Хөдөө Аж Ахуйн Байгууллага-FAO “Ургамал хамгааллын тухай олон улсын конвенци”-ийг баталсан. Энэхүү конвенцид дэлхийн 185 улс гишүүнээр нэгдэн орсон бөгөөд манай улс 2008 онд нэгдэн орсон билээ. Манай улсын засгийн газар энэхүү Конвенцид хүлээсэн үүргээ биелүүлж Ургамал хамгааллын үндэсний байгууллага буюу Ургамал хамгааллын агентлаг байгуулан ажиллахаар боллоо.
